夏日BO一BO

今年中大漫soc諮詢，時值未有job，空閒得很，又踩去八。

當日是《動漫廢物》播出的日子，因為諮詢會的關係而提早錄音。我對稻中興趣缺缺，所以沒有上去講，只在他們錄完音後join食飯。

出門前，因為要帶蛋卷出旺角打針，牠死也不願外出，我們便在門前搏鬥了十多分鐘，手上多了數道傷痕，才勉強把牠塞入那有缺口的竉物袋。我的感冒本來已經好得七七八八，一輪惡鬥，好像又燒起來了。幸好牠出了街之後還算乖，可能是怕生，立刻跳上的士出旺角，交給羅倫接手。

待他們錄完音，一起食飯。席間何生說下週五那位所謂我的「師妹」要上節目，叫我一定要到，到唔係唔到，但我想講我跟她一點關係也沒有，連面都未見過，反而何生就見過她、通過電話，不要時常話係我「師妹」囉！又唔見佢帶佢師妹上來做節目？（如果真的話，恐怕其他三位主持都不做。）

飯後大伙先去買點補給品再乘火車，見到GTO走去delifrance買晚餐給女友，honey和哥哥就話他是「廿四孝男朋友」，然後honey又講他的戀愛理論，最初的0.1秒我都仲好認真咁聽佢講，點知原來又是大男人歪理囉！哥哥想了一想，又對我說：「其實買晚餐給女朋友沒甚麼不對啊！」喂！我沒話過不對啊！為甚麼跟我說？車廂裡，honey跟女友通電，二人好像有爭執。其實我覺得，作為情人來說，我跟honey都一樣仆街。

入到中大，諮詢會已開始，場內人見到他們三個出現都有點嘩然，因為他們當晚應該是要做節目的。有一瞬間覺得好惡～我真係無聊。

諮詢進度超慢，四個題目就已經用了四小時，仲有人話早完可以食宵夜打機，嘥氣。有條友仔不斷發問on9問題，例如話自己個屆mark唔到sponsor，就話新莊mark sponsor都冇用，之後又俾其他老鬼串番，話其他屆都mark到，係唔知點解佢個屆mark唔到。

值得一提的是萌到做了新莊吉祥物的nanako，一個萌到死的孖辮眼鏡娘，一說話連我都會全身軟晒。她一出聲，就好似出了function card咁，【Lv 1 nanako】，作用：把所有「發問」和「追問」變晒「information giving」。【Lv 2 nanako】，作用：一句「多謝你啊～」一分鐘內全場萌死，無人「發問」和「追問」，亦會把之後的「追問」無效化。

可能因為捱夜，仲病多兩錢重。咳到死死下，最後咳到嘔番晒D晚餐出來，辛苦～不舒服，加上沒甚麼戲劇性的事發生，所以都想早走，不過入了夜都唔知點走好，所以繼續留下。

break的時候都有向新莊女孩子搭訕，但是可能之前冇見過（其實我都有來看傾莊，不過她們當然沒有印象啦～），加上我說話不得要領，所以沒甚麼效果，不過無啦啦有個非中大人來聽諮詢，又係怪Do既～但係我都好想講，我不是第一年來，已經來聽過至少三四屆的諮詢和傾莊，連佢地當年因分配soc房而跟資分會擺杯講數個會我都有旁聽，仲神心過留意自己大學個soc（因為中大的比較有趣），我唔係新臉孔囉～

現莊break時準備了糖水和小食，頗貼心。聽到他們有啤酒，我這個死酒鬼當然想以毒攻毒啦！但是我跟現莊又不熟，於是趁D人又講純愛人名句「飲o左酒會放D喎！」的時候，打算拉純愛人去攞酒飲，點知純愛人以為我串佢，應都唔應下我囉！

冇晒胃口，就跟他們參觀soc房，嘩～薔薇園起了新翼呢！一大堆過期SpXXd up雜誌用來塾床～未見過咁惡的學會！

中大漫soc，惡！

深深覺得我們有代溝，身為漫soc新莊不知道《五星物語》，全莊十幾廿人竟然冇人聽過，仲話要推廣漫畫給其他人，推廣o左俾自己先啦！另外就是知道小狼但係又未聽過《方墨》，今屆的水平大約都估到呢～冇乜勁人。

當他們講到動漫頻道時，動漫廢物的主持們就興奮起來，想講D　o野，但是又不知要講乜o野，仲叫我代表方墨先發言。唔好玩啦！我又不是基本會員，憑乜o野發言啊？最後由哥哥好似賣花讚花，唔知宣傳定問問題咁講o左Do野就算數。

一直con到天光，本來到五點近六點時，我打算有車就走的，因為已feel到自己又燒過，不過哥哥話一齊食早餐，我又留多了一會，留多了一小時，他們還未完，我頂唔順就先走了。

好不容易熬回家，倒頭便睡。

唉～晚上還要工作呢～